Логин
Пароль
Запомнить меня
Калык йылол-сямъёсты утён бордын ужало егитъёс. Кияса ёросысь школаосын дышетскисьёс но ужась егит адямиос та нуналъёсы "Хоровод дружбы" нимо фестивальлы дасясько. Со Кияса черкогуртын шуркынмон толэзе ортчёз.
Мадьяр калык выжыкылъес удмурт семьяосысь нылпиос дорын куноын. Ижкарысь "Шудон корка" клублэн туэ сӥзьыл понна нырысетӥ ӝытэз Кузебай Герд нимо нылпи садын ортчиз. Отчы ветлӥсь пиналъёслы но соослэн анай-атайёссылы элькунамы Венгриысь куное вуэм кузпалъёс Тиллари Габор но Вайда Жужа мунё спектакль дасязы. Возьматон мадьяр кылын ке но мынӥз, удмурт покчиослы актеръёсын ӵош выжыкылэ пыриськыны со чик но ӧз люкеты.
Нырысети коньывуонысен Россиысь школаосын но ӧнер удысъя дышетсконниосын нылпиосты сюдонъя выль куронъёс пуктэмын. Пиналъёсты кык пол сюдоно. Соин ӵош куд-ог сиён-юонъёсты дасяны лэземын ӧвӧл, кылсярысь, губи, газэн напитокъёс, вӧй пӧлын ӵыжатэм сиён. Нош бакча емышъёс, сӥль, чорыг — тросгес луыны кулэ. Таӵе куронъёс шаерамы вазенгес тупатэмын вал. Солы луыса, нылпиослэн тазалыксы юнма.
"Воршуд" фестиваль ужзэ мытӥз. Отчы пыриськон понна быдэс Россиысь пӧртэм выжы калык коллективъёс вуизы. Нырысь ик соослэсь быгатонлыкъёссэс дунъяны быгатӥзы 8 ёросъёсын улӥсьёс. Вавоже вуылӥзы Татарстанысь кавказ эктонъёсъя коллектив но Карелиысь кырӟанъя но эктонъя "Кантеле" кун ансамбль. "Воршуд" фестивале пыриськыны быгато ни Ижкарын улӥсьёс но.
Вуоно арын шаерысьтымы гурт сюресъёсты тупатонъя нимысьтыз программа ужаны кутскоз. Со чакламын 5 арлы. Сюресъёсты тупатыны 21 миллион манетлэсь трос коньдон кулэ луоз. Таӵе юрттэт кулэ каро шаерысьтымы котькуд ёросын.
16-тӥ коньывуонэ элькунысь гурт но сиен-юон поттон удысъёсын тыршисьёс ӧнер нуналзэс пусйё. Шаерысь возесъёсысь тужгес но усто ужасьёсты Ижкарысь "Аксион" культура юртын сӥлы каризы элькун кивалтӥсьёс. Ӟеч кылъёсты кылзэм но вормонъёсынызы данъяськем сяна, люкаськемъёс азьланезлы малпанъёс сярысь но вераськизы.
Та арнязэ Ижевск егитъёслэн шоркарзылы пӧрмоз. Удмуртия пумиталоз огъя Россиысь егитъёслэн огазеяськонъёсысьтызы азьветлӥсьёсты но пӧртэм выжы калык коллективъёсты. Ижкарын огдыре куинь ужрадъёс ортчозы — "Мы — Россияне" форум, "Россия. Регионы. Этносы. Позитивный опыт сотрудничества." улосвыл конференци но Россиын улӥсь калыкъёслэн "Воршуд" фестивальзы. Отчы пыриськозы выжы калыкъёслэсь лулчеберетсэс утись егитъёс. Соос Ижкаре вуизы ни.
Удмурт кылбурчиос — Петр Захаров, Алексей Арзамазов, Лариса Орехова — Франциын куноязы. Петр Захаров кунгож сьӧрын улӥсьёсты тодматӥз француз гожъясьёслэсь удмурт кылэ берыктэм кылбуръёсыныз.
Пӧртэм выжы калыкёслэсь пӧртэм вакытэ гожтэм куараоссэс утёнэз туала техникалы оскозы. Куараосты утёнъя архив кылдытыны басьтӥськизы Санкт-Петербургысь Пушкин нимо университетын тыршисьёс.
RU-CENTER. Регистрация доменов и хостинг на www.nic.ru.
